Fór í hvíldarinnlögn í dag

Það var hringt í okkur í morgun og okkur boðið að ég kæmi á sjúkrahúsið í dag til hvíldarinnlagnar.  Við auðvitað þáðum boðið og er ég núna komin á Kanner Klinik og verð þar í nokkra daga.

Mamma ætlar að skreppa með pabba til London í fyrramálið og ætla þau að reyna að eiga nokkra daga þar saman.

Ég á bestu systkini í heimi

Veikindi mín hafa verið erfið mér og mínum.  Yfirleitt minnist ég á að mamma og pabbi eru að gera þetta eða hitt en það má ekki gleyma systkinum mínum.  Þau eru alltaf ofboðslega dugleg að hjálpa og aðstoða.

Stóri bróðir er alltaf eins og klettur þegar á þarf að halda og tekur mikinn þátt í minni umönnun.  Hann er alltaf á varðbergi og ef eitthvað bjátar á þá er hann komin til að aðstoða.  Það eitt að baða mig tekur á og hann hefur nú ákveðið hlutverk til að það gangi vel og gerir það frábærlega.

Stóra systir kemur mér alltaf til að brosa.  Sama hvað gengur á.  Það geta verið þungir morgnar en um leið og Edda kemur inn í hádeginu þá er eins og það lyftist á mér brúnin.  Mér finnst hún svo skemmtileg og hún er svo dugleg að leika við mig.  Fimleikar, dans og hennar frábæri söngur fær mig til að brosa mikið og léttir minn dag.

Mig langaði bara að segja öllum að ég á bestu systkini í heimi !