Mjög slæm mettunarföll

Síðan ég kom heim úr hvíldarinnlögninni hafa flestir dagar bara verið nokkuð þokkalegir.  Ég er þó búin að vera að fá hita annað slagið því að svo virðist sem ég er með einhverja bakteríu og þarf því að fara á fúkkalyf enn og aftur.

Þessi pest getur verið mér erfið því að slímmyndun verður enn meiri og nóg er nú samt.  Því hefur þurft að hreinsa öndunarveginn mjög vel og oft því annars er ég ekki að halda mettun, ekki einu sinni með öndunarhjálp.

Í morgun átti ég til að mynda mjög slæm öndunarföll.  Tvisvar varð snökt fall á mettun langt niður fyrir hættumörk og í annað skiptið svo slæmt að hörund varð bláleitt.  Stutt var í að ég þyrfti súrefnisgjöf og að ýtt yrði á neyðarhnappinn, en pabbi náði þó að hreinsa öndunarveginn og náði ég mér nokkuð fljótt í kjölfarið.

Ég er líka búin að eiga góða tíma og líka sýnt mitt besta, notið þess að fá heimsóknir eða horfa á mitt uppáhalds sjónvarpsefni.  Á laugardagskvöldið fóru mamma og pabbi á þorrablót.  Það er auðvitað ekki hlaupið að því að fá pössun fyrir mig ef þau vilja fara út en hver önnur en sjálf barnalæknirinn minn, hún Sigurlaug bauðst til að vera hjá mér á meðan þau færu á ballið.  Ekki amalegt að fá sjálfan læknirinn til að annast mig á meðan mamma og pabbi fara út.

 

Athugasemdir

[Gróa (Stulla-mamma) (IP-tala skráð) 16.2.2009 kl. 13:40]

Vona að þú náir úr þér þessari pest!  Sem betur fer styttist í vorið og að flensutímabilinu fari að ljúka.

Kveðja, Gróa

[Pétur B Snæland (IP-tala skráð) 17.2.2009 kl. 21:11]

Hæ Luxemborgarar! Það er ekki dónalegt að komast í þorramat. Ég er nú í mekka þorramatarins en hef ekki fengið einn bita af þorramat! Ég hefði kanski átt að smella mér til LUX í þorramat. Þá hefði maður líka fengið að sjá litlu prinsessuna ykkar! Stattu þig litla ljós! Sá mynd af Sigga presti hann skírði Davíð Frey hennar Berglindar minnar heima hjá henni í Hamravík. Bið kærlega að heilsa honum. Kær kveðja frá okkur, Pétur og fjölsk.

[Magnús (IP-tala skráð) 18.2.2009 kl. 10:51]

Gangi þér vel að ná úr þér pestinni og svo í framhaldinu.  Bið að heilsa pabba.