Ferðaðist um í sjúkrabílum í dag

Það fór ekki svo að dagurinn yrði án vandamála.  Rétt fyrir hádegi hætti magahnappurinn að virka og því var ekki hægt að koma í mig næringu.  Pabbi reyndi allt sem hann gat til að reyna að fá hann til að virka en ekkert gekk.  Hjúkrunarfræðingurinn sem kom til mín í dag gat ekki heldur reddað hnappnum og því var ekkert annað að gera en að fara niður á sjúkrahús og fá nýja hnapp.

Að skipta um hnapp er í flestum tilfellum minniháttar aðgerð en þar sem ég hafði verið með magavírusinn fyrr í vikunni þótti ráðlegt að hafa allan varann á og gera þetta undir ströngu eftirliti.  Ég fór því fram og til baka á sjúkrahúsið í dag í sjúkrabílum, aðeins til að setja nýjan hnapp í mig sem tók örfáar mínútur.

Eigum við ekki að vona að nú sé komið nóg af heimsóknum mínum á sjúkrahúsið í bili.

Athugasemdir

[Pétur B Snæland (IP-tala skráð) 27.2.2009 kl. 23:17]

Halló kæru þið. Við skulum vona að það verði ekki frekari sjúkrahúsferðir í bili. Vonandi fer að komast ró á litla ljósið ykkar.Það er aðdáunarvert að fylgjast með baráttu ykkar við þennan yllvíga sjúkdóm sem hrjáir ykkar yndislegu dóttur. Guð styrki ykkur í þessari raun kveðja frá okkur. Pétur B Snæland.

[Salóme Mist (IP-tala skráð) 28.2.2009 kl. 11:44]

Úff jú, vonum að þetta sé nóg af slíku veseni í bili! Reyndu að láta þér líða betur elsku litla snúlla. Þú og pabbi þinn hljótið að vera uppgefin eftir þessa rosalegu viku.